सइँ तमी गीत लिएर आइन् गायिका रेखा शाह

काठमाडौं– गायिका रेखा शाह नयाँ गीत लिएर श्रोता र दर्शकमाझ आएकी छिन् । अहिलेका चर्चित संगीतकार एवं गीतकार दीपक शर्माको रचना र संगीतमा रहेको ‘सइँ तमी कर्नाली पारि छौ, म त वारि चुँड्या छ तुइन…’ गीतमा सुदूर पश्चिमको जनजीवनको झल्को छ ।
उक्त गीतमा सुदूर पश्चिमको जनजीवनको लवज, संस्कृति र जीवन भोगाइको दुखलाई गीतको शब्द र संगीतमा उतारिएको छ । लोक कलेवरको संगीत रहेको गीतका शब्द पनि नेपाली जनजीवन र माटोका छन् ।
गीतलाई लिएर गायिका शाह निकै उत्साहित छिन् । उनी भन्छिन्- ‘सइँ तमी गीतबाट म निकै आशावादी छु । सांगीतिक जीवनको २५ वर्षमा फेरि अर्को कालजयी गीत गाउने मौका पाएँ । सिमसिमे पानीमा गीतजस्तै चर्चित र सबैको प्रिय हुन्छ भन्नेमा म निकै आशावादी छु ।’
गीतमा संगीत संयोजन गोपाल रसाइलीको रहेको छ । गीतको म्युजिक भिडियो नितिन चन्दको निर्देशनमा बनेको छ । सुन साइँली गीतको म्युजिक भिडियोबाट चर्चित बनेका गौरव पहारी र मेनुका प्रधानले गीतमा अभिनय गरेका छन् ।
सिमसिमे पानीमा, नजिक छौ तिमी, तिमीलाई केही हुँदै नहोस्, पोखूँ भनेलगायत चर्चित गीत र आधा दर्जन जति गीत एल्वम प्रकाशन गरेकी गायिका शाहले यो गीतको म्युजिक भिडियो आफ्नै युट्युव च्यानलबाट सार्वजनिक गरेकी हुन् ।