ठगीको आरोप लागेका कलाकार नारद खतिवडा चार दिन हिरासत मै रहने

काठमाडौं– अध्यागमन विभागको हिरासतमा रहेका चिनियाँ नागरिकलाई छुटाइ दिने तथा विभागको नियन्त्रणमा रहेका राहदानी फिर्ता गराइदिने आश्वासन दिँदै ९ लाख रुपैयाँ ठगी गरेको आरोपमा पक्राउ परेका हास्य कलाकार नारदप्रसाद खतिवडासहित तीन जनालाई अदालतको अनुमति अनुसार चार दिन हिरासतमा राखेर अनुसन्धान अघि बढाइने भएको छ ।

---

---

काठमाडौं उपत्यका अपराध अनुसन्धान कार्यालय, टेकुले पीडितको उजुरीका आधारमा सोमवार काठमाडौंका विभिन्न स्थानबाट तीन जनालाई पक्राउ गरेको थियो ।

पक्राउ पर्नेमा कलाकार खतिवडासहित विक्रमबहादुर थापा तथा गोपालकुमार गुरुङ रहेका छन् । प्रहरीका अनुसार कालिकास्थानस्थित अध्यागमन विभागको हिरासतमा रहेका ९ जना चिनियाँ नागरिकलाई छुटाइदिने तथा विभागको नियन्त्रणमा रहेका १५ वटा राहदानीसमेत फिर्ता गराइदिने भन्दै उनीहरूले पीडितसँग ९ लाख रुपैयाँ असुलेका थिए ।

घटनाबारे परेको उजुरीपछि काठमाडौं उपत्यका अपराध अनुसन्धान कार्यालयको टोलीले अनुसन्धान अघि बढाउँदै उनीहरूलाई पक्राउ गरेको जनाएको छ । पक्राउ परेका तीनै जनालाई थप आवश्यक अनुसन्धान तथा कानुनी कारबाहीका लागि जिल्ला प्रहरी परिसर काठमाडौं पठाइएको थियो ।

यसैबीच, प्रहरीले ठगी सम्बन्धी कसुरमा अनुसन्धानका लागि अदालतबाट म्याद थप गरेपछि हास्य कलाकार नारदप्रसाद खतिवडा चार दिन हिरासतमा रहने भएका छन् । घटनाबारे थप अनुसन्धान जारी रहेको प्रहरीले जनाएको छ ।