नेपाली कलाकार झलनाथ खत्री अमेजन प्राइम सीरीजको प्रमुख भूमिकामा 

काठमाडौं– नेपाली कलाकार झलनाथ खत्रीले अन्तर्राष्ट्रिय ओटीटी प्लेटफर्म अमेजन प्राइमको सीरीज ‘द पिरामिड स्किम’ मा एक महत्वपूर्ण भूमिका निर्वाह गरेका छन् ।

---

---

हालै सार्वजनिक भएको यस सीरीजको पहिलो सीजनका ७ एपिसोडमध्ये ४ एपिसोडमा उनी देखिएका छन् ।

मल्टी लेभल मार्केटिङ (एमएलएम) स्किमको विषयवस्तुमा आधारित यो सीरीजमा खत्रीले निर्णायक भूमिकामा अभिनय गरेका हुन् । सीरीजका आगामी सीजन निर्माण भएमा उनी त्यसमा पनि निरन्तर देखिने सम्भावना रहेको छ ।

तर, अमेजन प्राइमसम्मको यो यात्रा खत्रीका लागि सहज भने थिएन । अभिनयप्रतिको रुचिलाई पछ्याउँदै उनले भारतको दिल्लीस्थित अस्मिता थिएटर ग्रुपमा दुई वर्ष अभिनय प्रशिक्षण लिए । उनी नेपालको ओस्कार इन्टरनेशनल फिल्म कलेजका विद्यार्थी पनि हुन् ।

परिवारबाट विदेश जान सुझाव आएका थिए तर अभिनयप्रतिको लगनले उनलाई देश छोड्ने साहस दिएनन् । उनी भारतसम्म भने पुगे र गोवामा वेटरको कामसमेत गरे ।  उनी त्यसपछि पुनः गोवाबाट अभिनयको अवसर खोज्दै मुम्बई पुगे ।

मुम्बईमा संघर्षका दिन बिताइरहेका बेला चर्चित सीरीज ‘पाताल लोक’ को कास्टिङसमेत गरिसकेको कास्टिङ बे कम्पनीले ‘द पिरामिड स्किम’ का लागि अडिसन खुलाएको थियो । खत्रीले पनि अडिसन दिए ।

प्रारम्भमा उक्त भूमिकाका लागि अर्कै कलाकारको नाम सोचिएको भए पनि उनको अडिसन प्रभावशाली बनेपछि निर्माण टिमको ध्यान खिच्न सफल भए ।

अडिसनपछि नेपाल फर्किएका उनलाई केही सातापछि सर्टलिस्ट भएको जानकारी आयो । त्यसपछि भएको थप प्रक्रियापछि करिब डेढ महिनामा उनी अन्तिम रूपमा छनोट भए ।

सीरीजको छायांकन मुम्बई, देहरादुन तथा हरिद्वारलगायत स्थानमा गरिएको थियो । आफ्नो भूमिकासम्बन्धी छायांकन पूरा गर्न उनलाई झण्डै तीन महिना लागेको थियो । एक वर्षअघि छायांकन सम्पन्न भएको यो सीरीज अहिले अमेजन प्राइममार्फत दर्शकमाझ आएको हो र प्रारम्भिक प्रतिक्रिया पनि सकारात्मक पाइरहेको छ ।

खत्रीले भने आफूलाई अब नेपाली फिल्म उद्योगमै थप काम गर्न मन रहेको कुरा व्यक्त गरेका छन् ।